للمهتمّين باللغة الإنكليزيّة: ⚠

 

أوّلًا رح احكي عن تجربتي وكيف كانت قفزتي النّوعيّة باللغة.😌

 

عملت كورسين أنا 4A و 4B

طبعًا ما بنكر استفدت منهم بس العلّة فيهم إن كتب ووظائف فالموضوع صار فيه رتابة وملل فالحماس بتعلّم اللغة بكون أقلّ. والعلّة التّانية إن الطّلاب اللي عم تتحدّث معهم تقريبًا من نفس مستواك، ولهجتهم محليّة فمارح تتحسّن لهجتك من خلال هالشّي وممكن تأخطئ وما حدا يصلّحلك.

 

فلهيك بعد ما خلصت من الدّورات بلّشت الشّغل الذّاتي.

 

Self_study.

 

اليوتيوب كان أعظم شي ليساعدني.

 

بدايةً أهمّ خمس شغلات لحتى تبدأ:

 

١. الرّغبة للتعلّم.

٢. الحماس.

٣. الاستمراريّة والممارسة.

٤. الانخراط باللغة بكافّة المجالات.

٥. يكون عندك دفتر خصّيصًا للإنكليزي، تدوّن عليه كل شي جديد بتتعلّمو، وخلّيه بين إيديك عطول.

 

وهيك بدأت وبلّشت بالقنوات اللي كانوا كالآتي:

1⃣

https://www.youtube.com/channel/UCxmEEGYXJkgJJO12nJhXl5g

 

هي القناة عربيّة مصريّة القناة الوحيدة العربيّة اللي تعلّمت منها.

 

مرّة وحدة قعدت قعدة متواصلة لمدّة تلت ساعات ونصّ عليها، ودوّنت كل شي حسّيت بفيدني، وبالعموم الفيديوهات قصيرة بس كتير مفيدة وبتعطيك الأساس لتمشي.

 

إذا حابّين تبدأوا فيها فبلشوا من الفيديوهات القديمة صعودًا للحديثة.

 

2⃣

https://www.youtube.com/channel/UCAQg09FkoobmLquNNoO4ulg

 

هي القناة علّمتني نصّ اللي بعرفو عن الإنكليزي.

 

البنت روسيّة وخاضت كتير بتعلّم الإنكليزي، بس بتحسّا أمريكية من لكنتا بعد رحلتا الطّويلة.

 

القناة كلها إنكليزي مافي ترجمة بس صدقًا بتفيد أكتر من العربي.

 

بس للي ممكن يعاني صعوبة بالفهم.

 

يشغّل الترجمة الإنكليزي اللي بتطلع تحت بال caption ويخفّف سرعة الفيديو.

 

وهيك كتير رح يسهل عليه الأمر وفيديو بعد فيديو بصير يفهم أسرع ويزيد السّرعة تبع الفيديو مو بس يرجّعو طبيعي لل normal.

وطبعًا خلّي الدّفتر معك حتى تستفيد من الكلمات الجديدة عليك والتّراكيب اللي بتقولها.

دوّنها وترجمها لحالك والكلمات الجداد جربوا حطّوها باسورد تليفونكم كلّ ١٥ يوم مثلًا غيروها بكلمة جديدة وهيك يستحيل تنسوها.

 

3⃣

https://www.youtube.com/channel/UC-g0gSStENkYPXFRsKrlvyA

 

وكمان هي القناة اشتغلوا فيها على نفس المبدأ اللي حكيت عنّو بقناة lingua. بس ميّزتها هي إنها بتحكي بالأميريكان آكسنت بحت، فإذا حابّين تكتسبوا الآكسنت تمامًا، فهي كتير بتساعد.

 

⚠أهمّ نقطة هي التّقليد.

 

كيف يعني ؟!

 

يعني تقلدوا ال native speakers .

 

أي حدا بيحكي إنكليزي بتحبّوه أو أي ممثّل بتحبّوه أو أي حدا بارع، جيبوا مقاطع إلو وعيدو وراه وقلدوه بالحكي وضلّوا عيدوا.

 

كتير رح تفرق معكم. ❤

 

⬛والنّقطة قبل الأخيرة الأفلام.

 

كيف بتتعلّموا من الأفلام ؟!

 

أول خطوة اختار فيلمك المُفضّل أو أي فيلم كان.

 

١. شوفو أوّل مرّة بترجمة عربيّة طبيعي واستمتع فيه.

 

٢. المرّة التّانية طفّي العربيّ وشغّل ال subtitle الإنكليزي. ودوّن كل المصطلحات الجديدة.

 

وفيك تقسّم الخطوة التانية على مراحل لحتّى ما تملّ وإنت عم تدوّن وتترجم المصطلحات والمفردات الجديدة.

 

٣. بعد ما بتكون أخدت كل شي جديد عطي حالك وقت لحتّى دماغك يتشرّب كلّ والمفردات ويتعامل معها كتير بس مو تحطّا وتحفظا متل كأنّك عم تدرس لامتحان. لا ببساطة تذكّر موقف الفيلم والكلمة بالجملة كيف كانت، ضل اتصفّح الكلمات اللي دوّنتها. وحاول تكون الكلمة الجديدة اللي كتبتها إنها تكون بجملة مشان ما تكون مجرّدة ومملة ورتيبة لعيونك.

 

٤. آخر خطوة احضر الفيلم آخر مرة بلا ترجمة.

 

وراقب دماغك وشعورك لحظتها.❤

 

🔷آخر نقطة اتعلّموا بالإنكليزي.

 

مو تتعلّموا إنكليزي بس وبطريقة مباشرة.

 

لا اتعلّموا شغلات عادية بالإنكليزي.

 

أنا صرت ابحث بعلم النّفس بقناة إنكليزيّة، ومن بعدا صار عندي كمّ كبير من المفردات بدون ما حسّ إلى جانب الشّغلات العظيمة اللي اكتسبتا من الموضوع الأساسي.

 

إي بالنّسبة للآكسنت:

 

أنا بحكي أميريكان آكسنت وبحبّو كتير، حاليًّا مضطرة اشتغل ع البرتيش بسبّب جامعتي وبعض المواد اللي بتطلّب منّي اعرف اللفظ البريطاني للكلمة.

 

أهم شغلة تعرفها الآكسنت مانو شغلة ضروريّة أبدًا

الأهمّ تلفظ الكلمة صح بدون ما تمزجها بلكنتك المحليّة

يس الآكسنت شي عظيم بس عمليًّا اللي بهمني افهم عليك شو عم تحكي أكتر من أي آكسنت بتحكي.

 

الصّراحة قبل ما ادرس إنكلش كنت قلّد الأميريكان كتير و هيك أتقنت الآكسنت بس حاليًّا بعد ما بلّشت ادرس linguistics اللي هيّة الدّراسة العلميّة للغة وفهمت الصوتيات أكتر قدرت افهم اللهجات بشكل أعمق واعرف بالضّبط الفروقات بيناتهم.

لهيك إذا مانك مختص بهالمجال فبدك تتّجه للتّقليد متل ما ذكّرت فوق أو تخلّي مختصّ يساعدك  (وهو مشروع عم فكّر فيه بعد خلّص امتحاني 🙈).

 

Maha Nassoum